A la descuberta di lacs
Dins l’antiquitat, de glaciers gigants an modelat lhi flancs des ponchas alpinas, creant concas e plans encuei ocupats da sugestius pichòts lacs. Sus lhi monts d’la Val Varacha s’n’en tròbon nombrós, grands e pichòts, que se pòlon rejónher embe de promenadas simplas e interessantas. Venon aquì descrichs en brèu sèt itineraris que pòrton a una quinzena de lacs entre lhi pus bèls de la valada.
BLINS
1) Pont Pelvo – Lac de Camossiera (2635m)
Desnivèl: 897 m
Temp de montaa: 2.15 - 2.45 oras.
Lo pichòt Lac de Camossiera se tròba dins una conca serraa entre lhi auts bastions del Bric Camossiera, del Pelvo d'Elva e del mont Camossieras. A l’entorn se tròbon autres pichòts lacs.
La promenada comença da l'antic pont Pelvo (1738m), plaçat 1 km après Chazales. Se remonta lo valon di Rèu, laissant a manchina lo viòl per lo Còl Bicòca. Arribats a una crosièra dapè un grand bauç se monta a manchina ental Valon de Camossierèta, après se pilha a drecha e s’arriba al Lac de Camossiera.
2) S. Ana de Blins - Lac de Mont Jòia
Desnivèl: 1233 m
Temp de montaa: 3.30 - 4 oras.
Lo Lac de Mont Jòia es lo pus aut des Alps Còcias: se tròba de fach a 3083 m d’autessa, ai pè mesjornals del mont omònim. Dapè del lac se tròba lo Bivac Boerio, embe 10 pòsts per durmir, sempre dubèrt. La part auta del percors es pituest drecha e da mal montar.
Laissaa la veitura s’la plaça amont de Sant’Ana (1850 m circa) se traversa lo riu sus un pont, après se pilha la mulatiera que, passant per las Granjas Croset (2020 m), intra ental Valon de Rui. Passat un lòng prat en plan, a 2500 m se laissa lo viòl que monta al Pas de Fiotrosa, per continuar a manchina sus una drecha traça fins al Pas de Mont Jòia (3065 m). Da aquì virant a drecha s’arriba fito al Lac de Mont Jòia.
.:esnhaca aquì per veire una mapa di lacs que se pòlon réjonher da Blins:.
PONTELACHANAL
3) La Chanal-Lac Nier-Lacs Blaus-Lac Bes
Desnivèl: 800 m
Temp de montaa: 2.15 - 2.45 oras.
Es un itinerari ben conoissut que pòrta a de lacs ben sugestius. S’arriba al plan del Còl Longet (format dins l’antiquitat da un glacier gigant) ente se tròbon lhi Lacs Bes, liats entre lor da un viasòl. La raitz "bes" en occitan vòl dir de fach "doble", "beisson".
Passaa La Chanal (1800 m) se laissa la via per lo Còl d’l'Anhèl e se pilha un chamin que traversa lo riu sus un pont. Se laissa la veitura a 1880 m just drant d’un second pont. Un viòl monta drech a manchina, traversa un bòsc de melzes, après s’auça embe nombrosas guchas fins a Granjas Antolina. Sobrat quarque bauç, s’arriba a una conca verda, se laissa a drecha lo viòl principal e se monta en 15 minutas al Lac Nier (2591 m), sobremontat da la peirosa Tor Reala. Tornats sal viòl principal se passa un serre e se cala dins la conca del Lac Blau (2533 m). Se continua verso Nòrd-òvest fins a una crosièra, se vira a manchina e se monta ai Lacs Bes (2649 m).
.: esnhaca aquì per veire una mapa di lacs que se pòlon réjonher da La Chanal:.
4) Chastèl - Lacs des Forcholinas (2807 m)
Desnivèl: 1204 m
Temp de montaa: 4 - 4.30 oras.
Lhi lacs des Forcholinas se tròbon dins un sarvatge combal peirós ai pè del Mont Viso. Lo major es lo lac natural pus grand de la Val Varacha. L'itinerari es tot senhalat, mas dins la part sobeirana manca un ver viòl e se passa dins las clapièras.
Da la ruaa Chastèl (1603 m) se pilha la mulatiera que remonta lo Valon de Vallanta fins a las Granjas del Riu (1988 m). Se pilha a drecha lo viòl que monta embe nombrós revòuts al pichòt bivac Berardo (2710 m) plaçat ai pè des Ròchas de Viso. Se continua vers est per serres e valonets de claps e s’arriba al Lac Grand des Forcholinas (2807 m).
5) Chastèl - Lac Bertin - Lac Long - Lac del Preire
Desnivèl: 1200 m
Temp de montaa: 3.30 - 4 oras.
Passant sus un tòc del famós "Vir del Mont Viso", s’arriba a tres pichòts lacs sus de plans de clapièras drant del Pas de S. Chafrè.
Dal Chastèl (1603 m) se pilha la mulatiera que remonta lo Valon de Vallanta fins a las Granjas Gueit, ente se pilha a drecha lo chamin senhalat dai marcavia de la GTA, que monta dins un bel bòsc de pins e melzes. Lo viòl remonta après lo Valon des Jarjatas sobremontat da espectacularas crestas de ròcha. Arribats en vista del Pas de S. Chafrè es possible montar a manchina al Bivac Bertoglio (2760 m) e al Lac del Preire (2706 m) o continuar sal viòl principal rescontrant lo Lac Bertin (2701 m) e lo Lac Long (2743 m) plaçat just a val del pas.
6) Chastèl - Lac Banhor - Lac Sech
Desnivèl: 470 m
Temp de montaa: 1.30 - 1.45 oras.
Es una promenada ental meravilhós Bòsc de l'Alevè; lo Lac Banhor e lo Lac Sech, cojats entre lhi elvos, son dui pichòts lacs que plan plan son en chamin a transformar-se en torbièras. Après de lonjas eissuitinas se presenton eissuchs. Viu aicì un pichòt crostacèu, coma un gamber, que semelha èsser un endemisme, exclusiu d’aqueste airal.
Da Chasteldelfin se continua vers Pont e La Chanal e se laissa la veitura just drant de la ruaa Chastèl. Se pilha una mulatiera que monta per travèrs vers est intrant ental bòsc de l'Alevè. Laissaa a drecha la via per las Granjas Bachassòt, se traversa un’eslarg e, montant a drecha, s’arriba al Lac Banhor (2017 m). Passant arlòng del lac, se continua sus un viòl senhalat que cala ental bòsc fins al Lac Sech (1890 m). D’aquì es possible calar directament a Chasteldelfin (1296 m) per un viòl que devala vers sud, truchant las Granjas Prat Lambert sobeiranas e sotanas e après las ruaas Alboin e Bertinas (servias da via que se pòl far en veitura). L'itinerari pòl èsser fach decò en sens contrari.
.: esnhaca aquì per veire una mapa di lacs que se pòlon réjonher dal Chastèl:.
SANTPÉIRE
7) Madòna de la Nèu - Lac de Luca
Desnivèl: 600 m
Temp de montaa: 1.45 - 2 oras.
Lo lac de Luca es plaçat dins un pòst ben sugestiu: sus un panoramic verd plan ente sovent se rescontron cavals en pastura.
Da Sant Pèire se remonta la valada sobrant Chucheis, après se vira a drecha vers la Ròcha. D’aquì se continua a manchina sus una via que se pòl far en veitura e que just après deven esterraa. Se laisson las ruaas de Champanés e Puèi e se passa just a mont de la gleiseta de la Madòna de la Nèu (1711 m). Laissaa la veitura dapè una crosièra embe una barra, se pilha a drecha sus la via principala esterraa. Just drant del pont sal Riu Milanés se prend a manchina una pista per tractors e tamanhons e se pilha per lhi prats vers una meira. Sensa lhi arribar se vira enca’ a manchina e se monta per una verda riba ente se rescontra un viòl. Après quarque revòut s’arriba sal plan a mont del pichotin lac Cibuo (2160 m). Se pilha a drecha per serres e conhs plens de ròchas, e fasent una mesaluna, s’arriba al Lac de Luca (2371 m).
.: esnhaca aquì per veire una mapa di lacs que se pòlon réjonher da Sant Pèire:.