Pont e La Chanal
Pont e La Chanal es la darriera comuna de la Val Varacha que se rescontra drant de passar en França. Es format da qualque centre e nombrós nuclèus, plaçats amont e aval del lac artificial del Chastèl. Domini de lhi Evescos de Turin, era feude di Senhors de Pont (XII secle). Après ven estachat a Chasteldelfin e a Brossasc, seguent lor mesme destin. Ental 1190 passa ai Marqués de Saluces e resta a lor fins que aquestas terras passen ai Savòia . Ental 1743 es teatre de luchas entre lhi exercits sabaud e franc-espanhòl.
A La Chanal, pichòt joièl de l’auta val (fòto en bas), darrierament intrat ental circuït “Lhi pus bèls borgs d’Italia”, la gleiseta de Sant’Antòni, d’origina romanic-gòtica, presenta un meravilhós cloquier a vela e un cicle de pinturas a fresc just retrobat que remonta a la premiera meitat del XV sec. Un autar en bòsc policròm abelìs l’absida de la parroquiala de S. Lorenç.
Pont e La Chanal es centre de vacanças l’istaa e d’espòrt l’uvern, embe bònas estructuras toristicas e esportivas. Las autras resorças venon da l’enlevatge des bestias, da la silvicoltura e da l'agricoltura.
En ocasion des festas patronalas es possible admirar òmes, fremas e mainaas en la vesta tradicionala.
Ben interessant es l’abilhament des fremas embe una vesta de drap de lana, niera - decò aquela da esposa - embe tres grandas bastas sus l’eschina e drech, sensa la vita estrecha. Es adornat da un faudil e una poncha, de coton o lana, de seda per las esposas, mas totun da las colors pituest aviscas. Preciosa es decò la bèra, cúfia decoraa embe un dentèla de poientas, realizaa mincatant embe centenas de fusèts. Lo musèu del Costum en cò de l’antica Mission Capucina de La Chanal garda una meravilhosa colleccion.
Las festas patronalas ente venon portats lhi costums an sempre una part religiosa embe la S. Messa, la Procession embe lhi costums e l'enchant, asta publica que cuelh sòuds destinats a las chapèlas, e una part laica que preved juècs e lo bal que pòl pas mancar.
Ben interessant en ruaa Chastèl es lo Musèu del mòbil de l’auta Val Varacha que garda una interessanta colleccion de mobilia antica e exposicions tematicas que chambion tuchi lhi ans. Chastèl e Vilaret son decò dui ponchs importants per las promenadas al bòsc de l’Alevè e ai siei lacs (Banhor e Sec)
Informacions Utilas
Autessa: 1614 m
Merchat setmanier: mars
Distança da Coni: 66 km
Centres abitats e ruaas: Chastèl, La Chanal, La Madalena, Vilaret
Protector: S. Maria Madalena (22 julhet) e S. Lorenç (10 avost)
Centres esportius: champs balon a 5, tennis, balon a vòl (ruaa Madalena)
Servicis: bancomat, farmacia (istaa), airal sosta camper, parc juècs per mainaas, airal picnic (ruaa Madalena)
Espòrts d’istaa: promenadas, mtb, ciclisme, rampinhada, equitacion, wind surf e canoa, pescha
Espòrts d’uvern: esqui da fons, alpin, esqui alpinisme, chastras, cascadas de glaç
Comuna: tel. 0175/95.01.74
Site: http://www.comune.pontechianale.cn.it
E-mail: pontechianale@ruparpiemonte.it